اعراض تلف بوجيهات السياره

أعراض تلف بوجيهات السياره

تعتبر البوجيهات من اهم الاجزاء فى محرك السياره البنزين لانها تحدث الشراره المطلوبه لحدوث حريق داخل المحرك وبدونها لن يتم تشغيل محرك السياره،البوجيهات جزء مثل باقى اجزاء السياره يحتاج الى صيانه او تغيير بمعنى ان له توقيت ولازم يتغير بس الفكره ازاى تعرف الوقت ده.

الصح اللى المفروض يحصل انك تغير البوجيهات زى ما الكتالوج يقول بالظبط بس الفكره انك مش هتعرف تجيب بوجيهات اصليه لان المعظم اللى فى السوق مضروب مش اصلى فحاول تشترى البوجيهات من مصدر موثوق فيه زى التوكيل وبعد كدا غيرها زى ما الكتالوج يقول لكن لو البوجيهات مش اصليه غالبا مش هتكمل معاك 20000 كيلو وهتحتاج تغيرها عموما ان كانت البوجيهات اصليه او تقليد فعند تلفها هيظهرك العلامات او الاعراض دى:

- العربيه بتقطع معاك وغالبا دا هيكون بسبب وجود ترسبات على البوجيه نفسه

- ارتفاع معدل استهلاك الوقود بشكل غير طبيعى

- سحب العربيه ضعيف

- موتور العربيه بيتلت ( فى هزه واضحه بشكل منتظم فى المحرك ودا بسبب تلف احد البوجيهات )

-ارتفاع صوت المحرك عن المعتاد

- صعوبه ادراه المحرك وخصوصا فى الصباح الباكر

لو كل الاسباب دى ظهرت او سبب واحد منهم فقط يبقى هتحتاج تغير البوجيهات و يفضل تغيير الكابلات ايضا.